الحيلة والفتيلة

عبيتلك كرتونة
متل ما امرت وفوقها سكّرة
جرابات، قلام …
عبّيتلك قطعة زرّيعة
بركي بالحرب بتتفائل فيها
عبّيتلك من كل شي عندي
تنين تنين… خدهون ع الحرب
عبّيتلّك جوز عصافير، دكر وانتى
عبيتلك البسكليتة
خلي العسكر ينتبهوا فرامها تعبان،
عبيتلك ملح وسكّر، شويّة دخان
وكتب سعد الله المصفرّة
خلي العسكر يسألوا عنو
لفّيتلك عروسة لبنة
مع زيت ونعنع واللذي منو
بدنا تفوت عليهم شبعان
مبارح عصريّة قريت المرسوم
ديبك نحنا
رجالك ع الموت
بس في شي مو مفهوم!
عرفنا انو نحنا نحنا
بس هنن مين؟
بدّك تحارب؟ حارب سيدي حارب
بس لمّا تحارب، تحاربنا نحنا
التعبئة عندون
عندون هنن، مين ما كانو هنن …
تبقى المرة الجاية وجهلهون المرسوم.

———————–

بقلم: Wa7ed Ghero

ملاحظة كبريتية:
 للاطلاع على  المرسوم التشريعي
رقم 104 الخاص بالتعبئة والاستعداد للحرب  < قوّص هنـــا >